miércoles, febrero 01, 2006

AS IPOCRESIYAS D'A SOZIEDÁ


Bibimos en una soziedá estrania, contraditoria y muitas begadas mega, isto se beye en muitas dembas sozials y una de ellas ye a biolenzia contra os animals. Ye asabelo de curioso porque si se fa un analís cheneral pararemos cuenta en que a mayoriya d'a chen ye á fabor d'os animals en cheneral, se dize que os reportaches d'a 2 sobre o mundo salbache son muito bien baluraus y si se pregunta sobre a conzienziazión meyoambiental todas as presonas dizen estar-ne, pero á la ora de autuar piensan que o suyo chesto indibidual no serbirá ta cosa y por ixo (u por pura galbaneriya) no fan guaire.
Agora, fa poco, emos beyiu cómo se han rechirau un camatón de siñals (más de 600.000) ta promober un cambio en a lai ta que as agresions contra os animals (como lo que olcurrió en a perrera de Tarragona) se penalizen de traza más fura, a fundazión Altarriba chunto con atras organizazions de esfensa d'os animals (entre as que i se troba la Colla Antitaurina Oszense) han feito un treballo sobrebueno, sólo fa falta que os politicos de Madrid no faigan una zaborreriya, como muitas begadas gosa olcurrir con as mobilizazions e iniziatibas ziudadanas.
Ista sensibilizazión me parixe á yo superfizial y un poquet ipocrita, ye bella cosa parellana á os/as dueños/as de cans, que parixen querer muitismo á las suyas mascotas pero que en reyalidá fan muito poco ta que a soziedá aprezie de igual traza á istos animals, cuan, por exemplo, no limpian as güeñas y as ziudaz y os parques publicos se combierten en un grau problema de salubridá y de estetica. Por que yo me pregunto, ¿cómo ye posible que a chen se sensibilize debán de una salbachada como lo que fazión á os cans de Tarragona y no pase lo mesmo cuan beyen por a tele una corrida de toros?.
O problema d'as soziedaz ye ixa graniza mayoriya silenziosa, ixos que sólo toman conzienzia de lo que olcurre cuan les pilla muito amán de ellos/as, pero muitas begadas ya ye tardi, como escribió Martin Niemöller, mosén protestante, 6 añadas engarcholau por os nazis. "Cuan os nazis binión á lebar-se á os comunistas, me callé; yo no yera comunista. Cuan engarcholón á os sozialdemocratas, me callé; yo no yera sozialdemocrata. Cuan binión á lebar-se á os sindicalistas, me callé; yo no yera sindicalista. Cuan binión á lebar-se á os chodigos, me callé; yo no yera chodigo. Cuan fuoron á por yo, no bi abió garra más que ese podiu protestar". Y asinas somos en iste aspeuto d'a lechislazión animal, si fan mal á o mío can me quexaré porque ta ixo ye de yo, pero mientras tanto importa poco u cosa os espeutaculos taurinos, a traza de matar en os mataderos u o trasporte que se da á os animals de torre. Á ran estatal poco u cosa se fa, á ran de Aragón somos aguardando una lai que ya beyeremos en qué se queda. Pero por ista mesma razón no bi-ha que esbafar-se, por ista situgazión en a que somos cal que luitemos más por cambiar as cosas, ta que ixa mayoriya silenziosa pare cuenta de una begada por todas de que que cualsiquier agresión á un animal mos degrada como seres umanos y que dibertir-se debán d'o sufrimiento no mos combierte en animals (ellos no se dibierten pas asinas), mos combierte en mostruos.

2 comentarios:

Colla Antitaurina Oszense dijo...

Con tu permiso te tomo tus artículos antitaurinos para irlos publicando en el blog de la Colla. Un abrazo.

Florencio dijo...

Ya sabes que sin problemas ;-)