Astí en Irlanda paras cuenta de una realidá muito clara respecto d'o estándar d'as luengas. A chen que ye aprendendo anglés charra con más fazilidá con atras presonas que tamién son a mesma situgazión que no con presonas que tienen como luega natiba l'anglés.
Ye normal, cuan tu aprendes cualsiquier luenga te amuestran o estándar, a forma más reglada y artifizial de cualsiquier idioma, de tal traza que ye más fázil comunicar-te con as presonas que han aprendiu ixa mesma luenga "artifizial". Os natibos de ixa luenga no charran o estándar, charran a suya bariedá patrimonial, por ixo resulta más fázil charrar entre estudians que no entre natibos y estudians.
Pero podemos comprobar como mesmo a luenga castellana tiene un fracaso escolar importán, y ye por o mesmo, encara que a tuya luenga materna siga o castellano en a escuela t'amuestran o castellano estándar, o castellano normalizau y normatibizau, garra presona naxe en un ambién en do se charre ixa "barián".
Isto no quiere dezir que no se'n tienga que amostrar o estándar d'as luengas, como ya se ha dito asabelo de begadas ye menester normalizar y normatibizar as luengas, asinas que no boi á repetir ideyas u argumentos.
Lo que quiero apuntar ye que si bas á fer por nezesidá y por fuerza una luenga estándar, ye una fateza fer-la más embolicada cuan puedes fer-la más senzilla. Y aquí trobamos de nuebo á la grafía, por qué fer-la complicada cuan se puede fer más fázil. ¿Queremos que a dificultá á la ora de escribir suponga un porcentache de fracaso escolar más gran?
Pues ixo, qui quiera que leiga y entienda.
