domingo, febrero 11, 2007

A bida burguesa


L’atro diya faziemos una besita á unos amigos de a mía nobia. Biben en una ziudá que se i troba á unas 100 millas de Chester. Asinas que cosa, dimpués de treballar de maitins pillamos l’auto y faziemos cuasi dos oras de carretera. Cuan pleguemos a berdá yera que me trobaba muito canso, ixo sí, os amigos estión encantadors y pasemos un buen rato.

Dimpués mos ofrezieron a posibilidá de ir-ie ta un Chimnasio en do conoxeban á o propietario, mos dizioron tamién que pillásenos bañador (mos lo eban comentau antis, cuan mos combidoron, pero no mos esplicaron a razón). Obediens, faziemos caso y pillemos l’auto (aquí en Inglaterra siempre cal pillar l’auto, as chens biben en casas, no pas en pisos, asinas que as distanzias gosan estar grans). Una begada en o Chimnasio lo propietario mos fazió una turné por as istalazions que, dito siga, yeran sobrebuenas. Pero lo millor estió ta o final, mos amostró as istalazions acuaticas, teneba una piszina prou gran y unatra que también teneba un buen tamaño, pero ista segunda antimás yera jacuzzi. Bi eba paretes de bidre y parti de o tellau tamién, yera ya de nueis y mos combidoron á ficar-nos en o jacuzzi. Profes que no tardemos cosa y a berdá ye que estió marabilloso. Dimpués de un diya de treballo, coflar-te en ixa piszina de augua calenta, con as burbuxetas corrindo por o tuyo perello yera d’o millor que podeba pasar-me. Pero encara podaba olcurrir unatra cosa ta que a situgazión pasase de sobrebuena a perfeuta. En ixos intes prenzipió á nebar y remero aber pensau “o paraíso esiste, yo agora mesmo soi en el”. I yera relaxau, disfrutando de buena compaña y beyendo cómo nebaba mientras yo yera en l’augua calenta.

En ixe inte comprendí más que nunca las tentazions de la bida burguesa, ¿á quí no le fería goyo tener un jacuzzi como ixe? Porque claro, i yéranos en un Chimnasio pribau, pero as istalazions yeran coleutibas ta dar serbizio a muita chen. Suposo que ye en a naturaleza de o ser umano, porque si dimpués fas un analís más mensurau paras cuenta que o gasto enerchetico ye altismo y que cuanta más chen pueda auzeder á iste tipo de servicios ye millor, no cal que siga una cosa nomás que ta pribilechiaus.

Por atra parti lugo me remeré de atras ocasions en as que tamién me sentí en o paradiso y que no eban requeriu de una cantidá tan desmesurada de diners (no porque yo ese pagau pon, sino por os diners que cuesta un jacuzzi de ixa grandaria), como sentindo una canta, estando con os mí*s amig*s u simplemén tumbau en a tasca beyendo lo zielo u as estrelas. Allora, remerando ixas cosas piensas que a bida burguesa te puede dar muitas satisfauzions, pero a berdadera y a buena de berdá ye estar satisfeito con tú mesmo, con ixe alazet puedes trobar o paradiso allí donde dezidas bibir.