Y encara que o fútbol ocupa un puesto muito chicorrón en a mía escala de balors e intreses, dimpués de beyer o partido de Paraguay contra España no puedo menos que escribir istas considerazions.
Primero a mía "chustificazión nazionalista", y lo escribo entre cometas porque he teniu que esplicar-la asabelo de begadas. Sin apasionar-me o fútbol puedo beyer según qué partius, en cheneral toz os de o mundial me cuacan, primero por a suya calidá esportiba, dimpués por a suya importanzia soziolochica y mesmo istorica. Pero no, noboi á fabor de España, y os forofos españols, incluso los más tibios nazionalistas españols no me entienden pas, y ye que o fútbol fa salir as radizes más tribals de la chen... Me dizen que "comprenden" que yo apoye a una "ipotetica" seleuzión aragonesa, pero que como ísta no esiste pas caldría que apoyase á España que ye lo más prsimo a Aragón. No, parixe que os forofos españols en tot lo suyo subidón no replecan a propia irrazionalidá de o fútbol. Asinas que yo les propongo lo siguién exerzizio mental:
Esmaxina que España no se cualificase u ye escaliminada, ¿qué país apoyarbaz? Bels me dizen Brasil, atros Franzia u atros EEUU. Allora yo lis pregunto, ¿Y por qué no Portugal? Ye o país más amán, no sólo cheograficamén, sino en cuanto á carauter, y en terminos istoricos (de 1580 á 1640 formó parti de a Corona española). Pues porque no, me responden, cadagún en o fútbol se siente identificado con un país distinto cuan o suyo no chuega.
Á yo me pasa lo mesmo, si no ye Aragón en fútbol siempre prefiero á Alemania, en balonmano prefiero á Rusia, en boleibol me cuaca Brasil y en Balonzesto si no ye Aragón sí que prefiero á la seleuzión española. Y a prosimidá no tiene garra que beyer, ye o tipo de “chuego istorico” que ha desarrollau cada seleuzión. Y no, no odio a España, si odiase a España dende iste blog apoyarba la luita armada contra l'Estado español.
Yo quiero que gane Alemania, no por odio á España, si no simplemén, como dize una masima de iste esporte, porque "o fútbol ye asinas". Y as mías filias y as mías fobias son tan irrazionals como lo forofismo de atras. Y d'a mesma traza que no soporto as seleuzions italiana u archentina, mi deseyo ye que alemania acotole á España.
