Yera l'atro diya charrando con un compañero de feina y me diziba que iba á botar á o PSOE porque no le fan goyo os 'nazionalismos'. Aquí en Euskadi no ye fázil que a chen charre de politica, asinas que ascape me fiqué en a combersazión. A berdat ye que o mesache iste ye razonable y tras charrar una mica me reconoxió que sí que yera berdat que o PSOE yera nazionalista español, pero que lo beyeba más moderau que o nazionalismo de o PNV u o nazionalismo de o PP. Bien, ista ya yera atra custión, en zagueras sí que parixe que en muitas ocasions se puede aplicar a frase de Josep Pla, cuan deziba que os nazionalismos son como as bufas, nomás te cuacan as tuyas.O curioso ye que a mayoría d'os que botan á o PSOE nunca no se reconoxerán como nazionalistas, "o nazionalismo ye malo", te repetirán terne que terne. Á toda ixa chen me fería goyo preguntar-les agora qué piensan sobre as cuotas de espulsión de inmigrans que dende o gubierno se ha ordenau que faiga la polizía. Si no son nazionalistas españols ¿por qué forachitan á la chen? ¿No diziban frente as politicas de o PP que garra ser umano ye ilegal?
Dirán que lo que cal fer ye cumplir a lai, pero ixa lai ya yera dende fa muito, parixe que agora con a crisis les ha dentrau prisa por "escoscar" as carreras de os "antiesteticos" inmigrans. ¡Qué cosas más curiosas fan os partius "NO nazionalistas" y de cuchas!
