martes, marzo 01, 2011

Unatra derrota

Me dizen que en zagueras o modelo de aragonés que surtirá d'o gubierno de Aragón será o modelo neoarcaico. Ye una cosa que beniba pensando dende fa muito tiempo ya que, como se deziba en un articlo pasau que publiqué, "a cultura, que ye o poder, ha furtau á la chen o don d'escribir como se fabla." O poder menesta crear dificultaz, cal señalar á las presonas y dezir-las que son incultas porque anque sepan charrar no sapen escribir y menestan de 'autoridaz' que les digan cómo fer-lo.

Ye curioso, como en latín se deziba 'ad heri' resulta que agora la nueba grafía neoarcaica ha dezidiu que ye muito millor escribir 'ahiere' que digo yo, ya puestos á estar etimolichistas ¿por qué no escribimos 'a hiere'? Y asinas como en latín se escribiba 'scientia' agora cal escribir 'sciencia'. En aragonés no esiste pas diferenzia entre a pronunziazión de a B y a V, cosa que tamién ocurre con o euskara. Muitos sapen que todas as parolas bascas que bienen d'o latín u de luenga latina y que se escribiban con V pasan á estar escritas con B, a más conoxida puestar que siga la parola 'Autobia'.

O basco ye una luenga que no teneba una tradizión literaria (como le pasa á l'aragonés), asinas que fuera de bellas pedanterías que siempre se cuelan, eslixioron una grafía moderna, senzilla y que antimás ye super distintiba y clara de reconoxer, y como l'euskara tenemos muitismos más exemplos en luengas africanas, amerindias u australianas.

Pero aquí, en o nuestro país, o poder quiere un aragonés neoarcaico. Normal, á o poder le intresa que l'aragones siga una cosa pincha, que se beiga escrito por os cuatro popes autorizaus y parexca "una luenga de berdá" como me dizioron á yo un día. Pero que no siga pas popular, que l'aprendan os zinco frikis d'a Madalena y que se beiga como una condenazión similar á aprender latín si, bel día u bel sieglo, se meten clases de aragonés (optatibas, profes) en escuelas e istitutos. Y en os lugars en do encara se charra dixar-los como bella cosa anacreontica y, claro que sí, potenziando as suyas bariedaz.

3 comentarios:

O Charraire dijo...

Yo presonalment no creigo que siga pas una redota si se mira de chunificar a luenga y fer-la más coderent con a resta de luengas chirmanas que se fablan y s'escriben en a redolada.

Profés que l'antiga grafía más aparellana a lo vasco teneba aventallas importants, manimenos, ista ye más funcional con a neolochía.
Me cuacarba veyer un nueu diccionario d'aragonés adaptato lugo, pos escribimos muitas parolas cadagún de traza diferent y a yo me se fa qu'isto ye mala cosa ta una luenga tant menazata como a nuestra...

Florencio dijo...

A unificazión ta yo ye l'unica bentacha que beigo. O problema ye que beigo más partis negatibas que positibas, ta fablilandia no importa que escribamos 'zienzia' u 'sciencia', pero ta estendillar y popularizar l'aragonés o neoarcaico me parixe lo pior y por ixo creigo que á "o poder" le intresa fer una luenga de museo y ta ixo lo neoarcaico ye perfeuto.

Os frikis d'as luengas seremos os mesmos se faiga lo que se faiga, pero á yo me intresa más o zerclo esterior á fablilandia.

Olga Pilar dijo...
Este comentario ha sido eliminado por el autor.