Polizía ye una parola que probiene d'o latín y antis de o griego, biene á sinnificar a presona que esfiende a ziudat u ziudat estau. Pero muitismas begadas no ye asinas. A mía esperienzia con as polizías no ye estada muito buena, anque tampó no catatrofica, tamién he conoxiu polizías que yeran buenas presonas y buenos profesionals, pero nunca no en as suyas funzions, sino en atros ambitos. Siempre he notau en a traza de cómo se enfilaban enta yo una autitut de superioridat, de creyer-se superiors á yo, cuan en reyalidat soi yo qui ye finanziando los suyos salarios. Son obligaus á dezir-te o suyo numero de placa antis de que tú amuestres o tuyo DNI y nunca no he conseguiu tal cosa.
Ye curioso porque en Anglaterra ye prou diferén, en primeras os 'bobis' no leban pistola, cuan aquí mesmo en Alcañiz os locals la portan. Y dimpués tienen una autitut de serbizio publico, son ta serbir y aduyar á la chen. Un diya yera en Redhill aguardando á la mía parella, bi eba un mosico en a carrera con un sacso y en istas aparexió un polizía y se quedó como a un par de metros d'o mosico, parixeba que yera ascuitando a mosica, pero no, cuan o mosico remató a suya pieza o polizía se amanó y le dizió muito amablemén que bi eba abiu una quexa por o rudio y que en ixa parti no podeba tocar, pero que podeba ir-se-ne enta atro puesto. En Uesca olcurrió una cosa parellana, pero en ista ocasión os munipas autuaron con prepotenzia y biolenzia berbal, y si no ye porque bi eba un conzellero de CHA y atras presonas que les dizión que qué yera ixo a cosa podeba aber rematau prou pior.
O mío chirmán me contó cómo una parella de munipas de Uesca pilló á un grafitero, le metión una multa, o grafitero les baziló una mica, ellos le ofrexión lebar-le á casa y o grafitero (inozentemén) azeutó. Le lebón enta las afueras de Uesca y le prenzipión á cascar, el salió por patas y trató de denunziar, pero claro, a parola de a polizía bale muitismo más que la de una presona cualsiquiera.
Y creigo que una parti de l'orixen de istas autituz ye en o franquismo, cuan a polizía no yera ta aduyar, sino ta reprimir e ixo parixe que no ha cambiau cosa dende que se aprebó a famosa 'costi'. En o Estau español y en o territorio colonizau de Aragón ye lo mesmo, que tengamos "baturraina" que dizen por astí no amillorará cosa á no estar que se faiga como en Catalunya, metiendo camaras en comisarías y estando muito más denzima de as presonas que en teoriya mos ha de protexer.
No hay comentarios:
Publicar un comentario