No ye pasau guaire un mes y ya me soi contradizindo. Dizié que no tornaría á escribir en aragonés, y aquí soi, escribindo unatra begada.
Asinas que lo que cal fer agora ye dar una esplicazión. Escribindo y preguntando á unas y atras respeuto á la opinión sobre as grafías (porque a confusión que se implantó en a mía capeza yera grandisma) me encontré con o consenso de que cal escribir en aragonés, no importa cómo, á yo no me agrada la nueba grafía, ya lo he dito, pero tampó no me cuaca lebar a contraria nomás que porque sí.
En zagueras a reflesión final que me ha feito bascular enta continar escribindo en aragonés (con os regles lacsos de a grafía de o 87) ye una argumentazión macarra, pero que ye estada eficaz, me deziban alto-baxo: Se ha feito una lai de menimos, que encara no ye empentada, por un gubierno que puestar que no repita y que o siguién que surta bulque u no implemente a lai (yo creigo que o prosimo gubierno de Aragón será PP-PAR) y que en esta situgazión ubrir o melón de a grafía ye una cosa surrealista. Conclusión: que cadagún escriba como le pete.
Y con ista conclusión creigo que me boi á quedar, por agora, tal como son as cosas puestar que maitín piense que cal emplegar a grafía basca...
1 comentario:
Nhorabuena por escribir atra vez en aragonés.
Pero no me parixe guairer honesto por a tuya parti dicir que no ye tiempo d'ubrir o melón de a grafía.
Ixo lo tenebas que haber dito cuan tocaba: en o proceso de Chuntos por l'aragonés. Yo no m'hese sentiu tan solenco! XD
Pero bueno, a mayoría consideró que yera menister encetar un proceso ta fer una autoridat lingüistica (Academia): Consello, Instituto d'Estudios Altoaragoneses, Federación de Fablans, Nogará, REA ... Solo que uns poquetz decíbanos que no caleba.
De o II Congreso marchoron ya Consello, IEA y REA y agora, con ista grafía l'Academia-EFA perderá atros refirmes, sin duda.
Yo tiengo una custión platera: dimpués d'istos anyos no bi'n ha d'autoridat lingüistica ta l'aragonés, no bi'n ha que d'asociacions y cadaguna tien a suya autoridat en a suya Chunta Direutiva.
Yo soi de Fablans, asinas que a unica autoridat que reconoxco ye la de a suya Maya Federal.
Pensar, atra vez, que o venién guvierno no será PSOE-PAR sino PSOE-CHA y que Nagore será qui pueda fer ceprén ta endrezar l'Academia de verdat, ye un bucle que viengo sentindo dende lo primer Congreso (sí! ta 1987) y que se sintió asabelo devant de as eslecions de 2003, más que más.
Bueno, qué digo, puestar que, simplament, CHA ascuite agora á o PSOE y trusca con dentrar en os guviernos con o PAR. No sería novedat, preguntar-le-ne á Azeropantanero ...
Publicar un comentario