Unatro anyo más, y ban 422. A istoria no ye ta emplegar-la como arma, as cosas que son pasadas ya no se pueden cambear pas y por ixo cal parar muita cuenta con o que se dize, charrar de "España contra Catalunya: una mirada histórica (1714 - 2014)" ye una fateza y una simplificazión.
A istoria esplica, nunca no chustifica. L'agresión de Felipe I (II de Castiella) contra o Chustizia mayor y os fueros d'o reino no se pueden esplicar pas con a mentalidá que tenemos agora. Pero sí que se puede esplicar que os reis buscoron poder y si ixe poder yera amagau y protexiu por unas lais zentenarias yera loxico que atacasen a figura que teneba que esfender os fueros que furtaban poder a o rei más poderoso d'o suyo tiempo. Pero no, Felipe I no yera pensando en a situgazión que podemos tener en Aragón en o sieglo XXI.
Pero l'ataque ye un simbolo, en V de Vendetta se charra d'o poder d'os simbols, se diz bella cosa asinas como que a chen ye a que da poder y relebanzia á os
símbols, por sí mesmo un simbolo ye irrelenán, pero con sufizién chen dezaga fer bolar por os aires bel edifizio puede cambiar o mundo.
Güé en Aragón o simbolo de o Chustizia ye (como cuasi tot) cuasi folclorico, o gubierno de Espanya dize que quiere eliminar a figura y a chen no fa guaire caso, ye berdá que bi ha cosas más importans que a restructurazión administratiba, pero ye sintomatico d'a mentalidá aragonesa, somos un Pueblo colonizau y contento, que l'AVE enta Franzia pasa de Zaragoza, pues a chen s'encarranya en o bar y prou. Dimpués á animar á la selezión espanyola de fútbol.
A muerte d'o Chustizia podeba estar o simbolo d'a opresión d'o más fuerte contra o más feble, pero no ye pon, ye o cabo d'anyo ta una minoría, as instituzions han folclorizau y manipulau y a soziedá pasa. Triste cabo d'anyo por muitismas razons...
P.S. Fico Cartel de Chobenalla Uesca de 1999.
No hay comentarios:
Publicar un comentario