Una mica de istoria

Me fa goyo a istoria y me fan goyo los temas melitars, asinas que boi á escribir una mica de un episodio de a Guerra Zibil que ocurrió en 1938 en tierras de Teruel y Castellón.

A mayor bictoria de o exerzito republicano no estió Guadalajara, sino a esfensa de Balenzia tras a no muito conoxida linea X-Y-Z. O exerzito franquista perdió 20.000 soldaus fren á os 5.000 que perdió lo exerzito republicano.

Dimpués de a reconquista de Teruel Franco creyó que yera l'inte de atacar a capital probisional de o gubierno de a Republica y dentrar bictorioso en Balenzia, asinas que prenzipió una campanya que fracasó, probablemén por a falta de preparazión d'a mesma. Pero ixo mesmo sirbió ta que os republicanos treballasen en un sistema esfensibo que protexese Balenzia, no estioron unas fortificazions grans feitas de formigón, yeran lineas de trincheras que chugaban con una orografía (Sistema Iberico) prou faborable ta la esfensa, estió a linea X-Y-Z.

Dimpués de que o 14 de chunio de 1938 cayese Castellón en mans d'o exerzito sublebau a moral yera alta. O 30 de chunio prenzipia una ofensiba franquista con gran apoyo de artillería (más de 900 canyons) y  aereo (bellos 400 abions), o flanco dreito republicano ye crebau, Billavieja y Nules cayen o 7 y o 8 de chulio, os faxistas han plegau á la linea X-Y-Z, á pesar de as bictorias inizials os cuerpos franquistas se estrellan contra las lineas republicanas.

O 13 de chulio a ofensiba pasa á o sector zentral, os italianos abanzan rapidamén grazias á os suyos blindaus, os faxistas se las prometeban muito felizes, ¡mesmo organizaron "biaches turisiticos" enta o fren de baralla! Tratan de zarrar o saliente que teneban en Rubielos, pero lo exerzito republicano se repliega en orden, una unidá de carabineros resiste en Mora de Rubielos, pierden territorio pero á costa de grans perdidas umanas ta os franquistas. Dende o saliente de Rubielos se fan contragolpes que amenazan os flancos faxistas, pero a superioridá en ombres y materials de os sublebaus se impone. 

O fren se estabilizó en a linea X-Y-Z, dica que o 24 de chulio o exerzito faxista atura os ataques y se replanteya a estratechia. As perdidas umanas son estadas muitismo grans, a bictoria, encara que esfensiba, caye de raso en o bando republicano.

Á pesar de a suya importanzia ista ye una baralla que ha pasau sin pena ni gloria en a istoria de a guerra zibil, as razons son claras, en o bando sublebau yera remerar u remarcar una error muito gran de Franco, a suya obzecazión en atacar Balenzia cuan os suyos asesors le deziban de atacar Catalunya, y en iste caso no se podeba chitar a culpa á os italians, todas as errors cayoron en a direczión de a estratechia.

Por l'atro puesto en o lau republicano no partizipó garra unidá "politizada" ya siga d'o PCE u d'o PSOE, ni tampoco no estioron os brigadistas internazionals. Asinas que no se han trobau presonas (subenzionadas) que cuenten a mayor bictoria d'o exerzito republicano y a mayor derrota de as tropas sublebadas.

Güembras d'a istoria que á yo me fan goyo alumbrar encara que siga una mica.

:)