Leigo con tristura como Sozialista dixa de escribir y mos dixa con una mica de menos luz que antis. No mos sobran blogs en Aragón, y menos de chen que ye capaz de aportar ideyas y suenios de a calidat que gosaba ofrexer.
No dixo de preguntar-me qué ye de os blogs albandonaus, sí que ye zierto que se quedan en o rete y siempre bi habrá chen que los trobe y encuentre cosas intresans y que le motiven. Pero no puedo dixar de pensar que ixos blogs i son en una mena de fosal. Si chitaz una güellada á os blogs que recomiendo (astí á la dreita) beyerez como bi ha blogs que fa muito que no se esbiellan, e ixos blogs que no tienen testos nuebos son como finestras zarradas que continan en a paret de una casa, pero que ya no airean ni alumbran.
Nomás deseyo, que ixe fosal de blogs no siga sino una mena de limbo d'o que surtan antis con antis. Anque sé que ye difízil mantener un blog y que muitas begadas a ispirazión parixe que ye de bacazions, suenio conque ixas finestras se tornen á ubrir y que en o rete tengamos una mica más de luz y de aire fresco.
No hay comentarios:
Publicar un comentario