AS GUERRAS ASIMETRICAS

A berdá ye que somos en un inte d’a istoria d’o más intresán. Somos en plena guerra, anque muita chen piense que no más bi ha guerra en Iraq, Palestina u Africa. Ye una guerra no declarada, a ran mundial y que se chuga más en o campo sicolochico más que en o militar. O conflito de Israel contra hezbollah ye una preba sobreclara. Si paramos cuenta en as zifras melitars beyeremos que Israel ha ganau, ye dizir, en terminos clasicos ha matau más “enemigos” que baxas propias. Pero hezbollah ha surtiu refirmau, internamén y mesmo internazionalmén. Asinas que en o campo sicolochico hezbollah ye ganador. No importa que aiga perdiu a muitismos soldaus que yeran perfeutamén entrenaus y que no recupere a suya capazidá militar en un par de añadas.

Fa poco que, en teoriya, se crebó un rete que pensaba atentar contra abions que surtían dende Anglaterra. O caos creyau de resultas de ixa informazión ye enorme. Puestar que aigan fallau en o campo melitar, pero han ganau sicolochicamén. Agora la chen que buela ye con medrana y beyendo terroristas en chen que, simplemén, parixe musulmana. Cosa que ye redicula, una persona que baiga á atentar tratará de bestir y parixer lo más estándar y ozidental posible.

Isto ye una guerra asimetrica que, en primeras, son ganando los extremistas musulmans. Y seguirán ganado mientras ozidén siga tan procupau por salbar dica la zaguera bida d’os suyos abitadors, (cosa que ye imposible) y no le importe que mueran atras chens en guerras que parixen estar muito luen.

De todas trazas os abions son cosas de críos. Cuan os extremistas paren cuenta d’as posibilidaz que oferta secuestrar un súper petrolero (u cualsiquier atra nabe gran) y fer-lo esplotar en una gran ziudá, allora ozidén “descubrirá” os suyos talons d’Aquiles, o petroleo y a parti d’o león d’o comerzio mundial (que se fa por mar).