As errors de l’Aznarismo

Cuan uno fa repaso d’a istoria no ye porque s’aburra u no tienga atra cosa que fer, ye porque d’a istoria se pueden sacar conclusions intresans que se pueden y deben aplicar á o presente. Agora somos bibindo un curioso prozeso de negazión d’a istoria más zercana. O PP sigue pensando que perdió as eleuzions chenerals por una mena de “conjura franco-marroquí-socialista”. Nomás falta que metan en o saco á os nazionalistas perifericos y á os masons. Pero lo PP perdió más que más por mala chestión, no pas economica si femos caso d’os indicadors macroeconomicos, sino por una mala chestión d’a soziedá en cheneral. Se beyó con o caso d’o Prestige en Galiza, con o trescol de l’Ebro en Aragón y Catalunya, con a custión d’a guerra de Iraq en o conchunto d’o Estau. Asinas que plebía sobre mullau cuan fazión a pesima chestión de l’atentau de Madrid l’onze de Marzo. Iste zaguer caso estió más importán, porque ya no yeran dizindo mentiras d’una cosa que olcurriba á miles de kilometros, yeran faltando á la berdá sobre un feito que a soziolochía española no iba á perdonar pas. Agora, tras miles de fuellas de sumario y un treballo de 2 años, en do no amanixe garra menzión á ETA u á conecsions con Marruecos u Francia, o PP sigue en a suya ideya de que chestionoron bien a masacre de l’onze de marzo y que a culpa no ye pas de els.

Pero quizau caldría pensar una mica más, fer un poder ta comprender á Aznar. A yo me resulta difízil d’entender por qué Aznar fazió lo que fazió. Cayó de raso en os encantos d’o poder imperial. Pero se suposa que representaba no unicamén á la chen d’o PP, sino á o conchunto d’a zidadanía d’o Estau español. Y si femos un chicot analís pararemos cuenta ascape de que, entre a chen de cuchas, o poder que os USA echerzen en o mundo no ye prezisamén bien rezibiu, u siga que somos charrando de prauticamén o 50 % d’a poblazión. Y dimpués podemos pasar á la dreita, bi ha muitas presonas, d’a dreita tradizional, que no catan con buenos güellos a “ixos americans que furtón Cuba y Filipinas”. D’atra man tenemos á la dreita más catolica, no cal ixublidar que Chuan Pablo II siempre condenaba o liberalismo más furo, que dixaba de lau as balors tradizionals d’a familia y condenaba á muitisma chen á la marguinazión. No boi á dentrar en a politica “sozial" d’o anterior Papa, con a que no soi d’alcuerdo pas, pero yera esclatero que ixas ideyas iban contra o ideyal americano. Ya finalmén podemos dezir que a chen de dreitas tiene un sentiu patriotico, y que no se siente pas bien tratada estando un segundón á la güembra d’os USA, que antimás, consideran, no ha tratau istoricamén bien á l’Estau español, un exemplo lo trobamos en os melitars: http://www.noseolvida.com/noseolvida/docs/articulos/pdf/nov04_05.pdf

Asinas que fendo iste chicorrón repaso nomás me caben dos posibilidaz. A primera ye que Aznar no tiene garra ideya d’a istoria y a soziolochía d’o Estau que presidiba, antimás de tener unos asesors malizos. Cosa que se beyerba confirmada en ixa ocasión en a que dizió que Fernando VII de Castiella (IV d’Aragón) estió rey d’o siglo XVIII. Unatra posibilidá ye que, conoxendo alto baxo tot isto, se creyese que nomás por a suya 'carismatica' figura podeba combenzer á las cuchas politicas y á las dreitas, de que a invasión de Iraq yera lo millor que se podaba fer. De cualsiquiera d’as dos maneras, una persona que no ye en conecsión con a reyalidá (ni istorica, ni autual) no merexe estar pas en o poder, ni ixa persona, ni o suyo proyeuto caudillista clamau PP.