jueves, noviembre 08, 2007
Presentazión de 'Entadebán'
Iste blog prebará de replegar articlos y opinions de todas as presonas que creyen menester una rechenerazión democratica y sozial d'o nazionalismo aragonés. As nuebas opzions y mobimientos politicos que han surtiu en Aragón en os zagueros meses, asinas como las tendenzias por o cambio dentro de Chunta Aragonesista implican chuntar esfuerzos enta modelos que coesionen politica y soziedá, dende ambiestas claramén soberanistas y de cuchas. O cambio sozial y o cambio politico ban de la man y menestan una partizipazión ampla, autiba y desinteresada d'o conchunto d'o nazionalismo aragonés.
Cualsiquier presona que quiera opinar, tendrá una oportunidá de fer-lo. Apoyamos a coderenzia de todas as presonas que son estau represaliadas dentro de l'unico partiu parlamentario nazionalista aragonés por espresar as suyas opinions en os zaguers años. Presonas con un binclo á Chobenalla, independentistas u simplemén renobadoras que creyeban que un partiu no se puede mantener-se pas durante 20 años baxo los mismos paradigmas ideolochicos.
Sin dembargo, pensamos que cal cambios reals, no pas cosmeticos. Un cambio de presonas, as que han dirixiu ixe partiu durante istas 20 añadas, porque nomás de ista manera se puede prenzipiar una nueba etapa. Un cambio en as trazas d'autuar, porque ye l'unica forma de tornar á trobar á la soziedá. Un cambio de ideyas, porque a politica parlamentaria no puede guiar pas a ideolochia de un partiu.
Dende l'unidá de as presonas que treballan por la emanzipazión nazional y sozial d'Aragón, dende a pluralidá de ideyas. Enta un nuebo nazionalismo aragonés.
Nimbía las tuyas aportazions á entadeban@gmail.com
